Քիչ չեն դեպքերը, երբ
զինվորները ունեցել են առողջության խնդիրներ և չեն զեկուցել վերադասին դրա մասին, որն
էլ բերել է ծանր հետևանքների, երբեմն էլ` մահվան: Այսպիսի դեպքերը կանխարգելելու համար
ՊՆ-ում բազմաթիվ քայլեր են ձեռնարկվել:
Օրերս Հայաստանի Հանրապետության
և Լեռնային Ղարաբաղի Հանրապետության պաշտպանության բանակի բոլոր զինվորներին բաժանել
են նոր գրքույկներ՝ հրատարակված ՀՀ զինված ուժերի ռազմաբժշկական վարչության կողմից:
Գրքույկը կրում է «Առողջության, առաջին օգնության և առավել հաճախ հանդիպող հիվանդությունների
վերաբերյալ մատչելի խորհուրդներ զինվորին» անվանումը և նպատակ ունի զինվորին սովորեցնել
ինչպես գործել առողջական այս կամ այն խնդիրների ի հայտ գալու դեպքում: Այս 56 էջանոց
գրքույկում մատչելի կերպով ներկայացված է, թե ինչպես պետք է զինվորները պահպանեն անձնական
հիգիենայի կանոնները: Բացի այդ, գրքույկում ուշադրություն է դարձված արտաքին միջավայրի
ազդեցությանը օրգանիզմի վրա, առաջին օգնությանը դժբախտ պատահարների, շնչառության խանգարման
դեպքում և հանկարծահաս հիվանդագին վիճակներում, ինչպես նաև կոտրվածքների, սրտի կանգի, այրվածքների, էլեկտրահարությունների, թունավոր միջատների և օձերի
խայթոցի ժամանակ: Գրքույկի մեկ այլ բաժնում
մանրամասն նկարագրված են սուր աղիքային և սուր շնչառական հիվանդությունները և դրանց
կանխարգելման միջոցները: Վերջին գլխում նկարագրված են որոշ ախտանիշներ և դրանց հնարավոր
պատճառները: Նշենք, որ ամեն մի դեպքի նկարագրության և առաջին բուժօգնության մասին հատվածում
նշված է, որ զինվորը պարտավոր է իր կամ համածառայակից ընկերոջ առողջական խնդիրների
դեպքում՝ առաջին բուժօգնությունից հետո դիմել զորամասի բուժկետ կամ մոտական բժշկական
հաստատություն:
Այս գրքույկը զինվորներին
դժբախտ պատահարներից հեռու պահելու մի փորձ է: Այն նաև կոչ է զինվորներին` առողջական
խնդիրների դեպքում չփորձել թաքցնել հիվանդությունը կամ ինքնուրույն բուժվելու փորձ
անել:
Այն վերջին ժամանակներս
զինվորների իրազեկվածությունը բարձրացնելու ուղղությամբ պաշտպանության նախարարության
կողմից ձեռնարկված հերթական քայլն է: Հարկ եմ համարում ընդգծել, որ պարբերաբար կազմվում
են բազմաթիվ նմանատիպ գրքույկներ՝ զինվորի ապահովության և իրազեկվածության մակարդակը
բարձրացնելու համար:
Զինվորը լավ սերտելով
և մշտապես ձեռքի տակ ունենալով այս գրքույկը` հեռու կմնա ծանր դեպքերից և կկարողանա
առողջ և ապահով ծառայություն տանել: Գրքույկը հատկապես օգտակար կլինի մարտական հերթապահության
ժամանակ, քանի որ շատ ժամանակ հենակետում զինվորները ունենում են առողջական խնդիրներ
ցրտից, երկար կանգնելուց, թունավոր միջատների, սողունների խայթոցից. ծայրահեղ դեպքերում
զինվորը պետք է իմանա ինչպիսի կանխարգելիչ միջոցների դիմի մինչև օգնության հասնելը:
Հ.Գ. Այս նյութս տեղ է գտել «Հենարան».am, «Հրապարակ».am, «Սլաք».am կայքերում, ինչպես նաև պաշտպանության նախարարության «Հայ զինվոր» պաշտոնաթերթում:
