Microsoft-ը պաշտոնապես Nokia ապրանքանիշը դարձնում է «Microsoft Lumia»

Macdigger.ru-ի փոխանցմամբ՝ Microsoft ընկերությունը պաշտոնապես հայտարարել է Nokia ապրանքանիշից հրաժարվելու մասին: Ընկերությունում ասել են, որ Nokia-ի տեղը կզբաղեցնի Microsoft Lumia ապրանքանիշը: Արդեն թողարկված հեռախոսները կշարունակեն Nokia Lumia ապրանքանիշով վաճառվել, բայց ընկերության մնացած նոր հեռախոսները նոր անունով կվաճառվեն:

Ընկերությունը նաեւ կշարունակի հին հեռախոսների սպասարկումը: Բացի այդ, այս գործընթացի արդյունքում, Nokia ապրանքանիշով սովորական հեռախոսները չեն հանվի վաճառքի: Microsoft-ին է պատկանում այդ սարքերի ապրանքային նշանի օգտագործման իրավունքը:

Microsoft-ի հեռախոսների մարքեթինգի ավագ փոխնախագահ Տուլա Ռյուտիլայի խոսքերով՝ ընկերությունը արդեն սկսել է Nokia-ի ծրագրերի եւ մի քանի կայքերի ապրանքանիշների փոփոխության գործընթացը:

Microsoft Lumia անվանմամբ առաջին հեռախոսները արդեն մոտակա ժամանակներս կարող են լույս տեսնել: Սակայն, եթե դրանք մինչեւ այս տարվա վերջ լույս չտեսնեն, պետք է սպասել MWC 2015 փետրվարյան ցուցահանդեսին:

Microsoft-ը պատրաստվում է սմարթ-ժամացույցներ թողարկել

Iphones.ru կայքի փոխանցմամբ՝ Microsoft ընկերությունը տարածել է տեղեկություններ մոտակա ժամանակներս սեփական սմարթ-ժամացույցների եւ ֆիթնես սարքերի թողարկման մասին: Նորույթը զինված կլինի զարկերակների աշխատանքները եւ ակտիվությունը ստուգող սարքերով:

Microsoft սմարթ-ժամացույցները կաշխատեն բոլոր բջջային օպերացիոն համակարգերի հետ (Windows Phone, Android եւ iOS), բայց ամենակարեւոր առանձնահատկությունը համարվում է աշխատանքի ժամաքանակի բարելավումը:

Չնացած Samsung ընկերության ցուցադրած Galaxy Gear-ի եւ Մոտորոլա ընկերության ցուցադրած Moto 360-ի լավ աշխատանքին եւ գրավիչ դիզայնին, նրանք էական թերություն ունեն. ժամացույցները պետք է լիցքավորման դնել ամեն օր: Microsoft-ի սմարթ-ժամացույցը պատրաստ է առանց լիցքավորման աշխատել երկու օր: Հենց այս առավելությունը կարող է օգնել ընկերությանը հետեւում թողնել հակառակորդներին:

Microsoft-ի «երկաթե նորույթների» թողարկման պատմությունը բավականին խառն է: Մի կողմից Zune երաժշտական նվագարկիչը թողարկումը եւ Surface տեսակի պլանշետների ոչ հաջող վաճառքը, մյուս կողմից Xbox 360-ի համար նախատեսված Kninect ռեկորդային վաճառքը:

Microsoft-ը կանի ամեն ինչ, որպեսզի թողարկի սեփական սմարթ-ժամացույցները, մինչեւ դա կանի Apple-ը: Բայց Կուպերտինոյի ընկերությունը բավականին խելացի գործեց. սեպտեմբերյան շնորհանդեսի ժամանակ ցույց տալով, թե ինչպիսին է լինելու Apple ժամացույցը նա կարողացավ պահել ինտրիգը, լռելով սարքի տեխնիկական առանձնահատկությունների մասին:

Լույս է տեսել Apple-ի iOS 8.1 օպերացիոն համակարգը

Հոկտեմբերի 16-ին, նոր iPad Air 2-ի եւ iPad Mini 3-ի շնորհանդեսի ժամանակ, ամերիկյան Apple ընկերության ներկայացուցիչները խոստացել էին, որ հոկտեմբերի 20-ին լույս կտեսնի iOS 8 օպերացիոն համակարգի առաջին մեծ թարմացումը՝ iOS 8.1 համակարգը:

Եվ ահա այսօր iOS 8.1-ն արդեն հասանելի է iսարքեր օգտագործողներին: Apple-ի հաղորդագրության համաձայն թարմացումը իր մեջ ներառում է նոր հնարավորություններ, բարելավումներ եւ նախորդ թարմացումների արդյունքում առաջացած խնդիրների լուծումներ:

Այս թարմացմամբ արդեն հասանելի է դառնում Apple-ի վճարման նոր համակարգը՝ Apple Pay-ը, որը կարող են օգտագործել iPhone 6-ի եւ iPhone 6 Plus-ի ամերիկաբնակ օգտատերերը: Հետագայում, ամենայն հավանականությամբ, համակարգը հասանելի կլինի նաեւ այլ երկրներում:

Այս թարմացմամբ beta տարբերակով սկսվում է iCloud նկարների գրադարանի աշխատանքը, որը թույլ է տալիս Ձեր iCloud-ի էջով աշխատող բոլոր սարքերում տեսնել Ձեր բոլոր սարքերից արած նկարները: Հնարավոր է դառնում նաեւ SMS հաղորդագրություններ ուղարկել iPad-ից եւ Mac-ի օգտագործելով iPhone-ը:

iOS 8.1 համակարգը լուծում է Wi-fi-ի, Bluetooth-ի հետ կապված խնդիրները, ավելացվել է 2G, 3G, LTE բջջային ցանցերի միջեւ ընտրություն կատարելու հնարավորությունը, Safari վեբ-դիտարկիչում վերացվել է թերությունը, որը կարող էր խնդիրներ առաջացնել տեսանյութերի դիտմանը եւ այլն:

Բավականին արագացել է iսարքերի աշխատանքը: Իհարկե, կան շատ փոքր նորամուծություններ, որոնք ի հայտ են գալիս օգտագործելիս:

Այս թարմացումը կարող են քաշել iPhone 4S, iPhone 5, iPhone 5C, iPhone 5S, iPhone 6, iPhone 6 Plus հեռախոսների, 5-րդ սերնդի iPod-ի, iPad 2, iPad 3, iPad 4, iPad Air, iPad Air 2, iPad Mini, iPad Mini with retina display եւ iPad Mini 3 սարքերի օգտատերերը: 

Դմիտրի Մեդվեդեւը iPhone 6 Plus է օգտագործում

Macdigger.ru-ի փոխանցմամբ՝ Ռուսաստանի վարչապետ Դմիտրի Մեդվեդեւը հայտարարել է, որ չի պատրաստվում հրաժարվել «խնձորային» սարքավորումներից: Նա կարծում է, որ ԱՄՆ-ի հետ տարաձայնությունները չպետք է պատճառ հանդիսանան ամերիկական սմարթ հեռախոսներից եւ պլանշետներից հրաժարվելու համար:

«Մեր հարաբերությունները Ամերիկայի հետ ի՞նչ կապ ունեն iPhone-ի հետ: Ուրեմն եկեք հրաժարվենք բոլոր արտասահմանյան իրերից եւ ի՞նչ կստացվի: Հյուսիսային Կորե՞ա: Դա մեր ճանապարհը չէ: Ընդհակառակը. ես կարծում եմ, որ ոչ մենք, ոչ ամերիկացիները, ոչ եվրոպացիները չպետք է որեւէ բանից հրաժարվենք: Ամերիկացիներին վնաս հասցնել Apple-ի արտադրանքից հրաժարվելու միջոցով ուղղակի ծիծաղելի է»,- ասել է Մեդվեդեւը:

Սոցիալական ցանցերում հրապարակված նկարներից պարզ է դառնում, որ Դմիտրի Մեդվեդեւը iPhone 6 Plus հեռախոս է օգտագործում: