6 օգտակար գործառույթ, որոնք կարող է կատարել հին iPhone-ը

Ի՞նչ անել հին iPhone-ի հետ նորը գնելուց հետո: Առաջին ամենահավանական տարբերակը վաճառելն է: Կարելի է, օրինակ, ծանոթներին հարցնել եւ էժան գնով առաջարկել հեռախոսը: Macdigger.ru-ն առաջարկել է 6 տարբերակ, թե ինչպես կարելի է օգտագործել հին iPhone-ը:

CarPlay-համակարգ

Cydia համակարգից տեղադրված անվճար կարգավորումը թույլ է տալիս iPhone-ի վրա միացնել մեքենաների համար նախատեսված Apple CarPlay-ը: Այդպիսով բոլոր ցանկացողները կարող են տեխնոլոգիան տեղափոխել բջջային հեռախոս, առանց մեքենային միացնելու: CarPlay-ի միջոցով iPhone-ը միանում է մեքենայի երաժշտական համակարգին եւ կառավարվում սենսորային էկրանի, ղեկի վրա գտնվող կոճակների եւ ձայնային հրահանգների միջոցով եւ թույլ է տալիս զանգ կատարել, երաժշտություն միացնել եւ SMS ուղարկել:

Անվտանգության տեսախցիկ

Հին հեռախոսը կարող է լավ անվտանգության տեսախցիկ դառնալ: Դրա համար անհրաժեշտ է ուղղակի App Store-ից համապատասխան ծրագիրը տեղադրել: iOS-ի համար ստեղծված ծրագիրը արձագանքում է շարժումներին եւ ձայնին: Ի դեպ iPhone-ը կարող է ձայնային ազդանշան տալ, եթե ինչ-որ մեկը այն անջատի հոսանքից:

«Խելացի տան» կառավարման վահանակ

Հին iPhone-ը կարելի է օգտագործել որպես հեռակառավարման վահանակ: Դրա համար պետք է սարքը տանը ինչ-որ տեղ տեղադրել եւ միացնել լուսավորության համակարգը, ավտոտնակի դարպասները, տաքացնող սարքերը, տեխնիկա եւ այլն:

Տեսագրանցիչ

Սարքից կարելի է լավ տեսագրանցիչ ստանալ: Իհարկե, դրա համար պետք է դիմային ապակուն ամրացնելու հարմարանք գնել: Երբ համապատասխան ծրագիրը միացրած է, հեռախոսը կանի այն ինչ անում է սովորական տեսագրանցիչը: Սա ունի ակնհայտ առավելություն քանի, որ դրա համար հատուկ սարք պետք չէ:

GPS-որոնողական համակարգ մեքենայի համար

Իհարկե, ցանկացած մարդ մեքենա գնելուց հետո ձայնաազդանշանային համակարգ է տեղադրում, բայց եթե, այնուամենայնիվ, գողերը կարողացել են մեքենան բացել, ապա հին հեռախոսը կարող է օգտակար ծառայություն մատուցել: «Գտնել iPhone»-ը գործառույթի շնորհիվ մեքենան կարելի է գտնել GPS-ի միջոցով: Եթե այդ ժամանակ հեռախոսը լավ է թաքցրած մեքենայում, դա նշանակում է, որ դուք հեշտությամբ կգտնեք մեքենան:

Ռադիոդայակ

Նորածին երեխան անդադար խնամքի կարիք ունի: Ծնողները նրան են նվիրում իրենց ամբողջ ժամանակը: Բայց եթե ստիպված պետք է որոշ ժամանակ բացակայեք, կարող եք վստահ լինել, որ երեխային հետ ամեն ինչ լավ կլինի: iPhone-ը կարելի է օգտագործել որպես ռադիոդայակ: Սմարթֆոնը արձագանքում է երեխայի արթնանալու կամ լացի դեպքում:

iPad-ը այսօր դարձավ 5 տարեկան

Macdigger.ru-ն գրում է. 5 տարի առաջ այս օրը՝ հունվարի 27-ին Apple-ը աշխարհին ներկայացրեց առաջին iPad-ը, որը առանց չափազանցնելու հեղափոխություն իրականացրեց համակարգչային տեխնիկայի շուկայում: Սարքը, որը կարողանում էր համատեղել համակարգչի, ընթերցանության սարքերի եւ մասամբ սմարթֆոնի հնարավորությունները, հայտնագործություն էր օգտատերերի համար

Apple առաջին կազմակերպությունը չէր, որը թողարկեց պլանշետ: Դեռ 2000-ական թվականների սկզբում շուկայում արդեն հասանելի էին ViewSonic V1100 եւ Fujitsu Stylistic ST4000 պլանշետները: Սակայն այս սարքերը բարձր գին ունեին (2-3 հազար դոլար), չափսերի եւ քաշի պատճառով հեշտ չէին օգտագործելու համար, մարտկոցը շատ քիչ էր աշխատում՝ 2-3 ժամ: Արտադրողները նշում էին, որ սարքը աշխատելու համար է: Հենց այդ նպատակով էլ սարքի հետ արտադրվել էր հատուկ գրիչ եւ սեղանին տեղադրելու հարմարանք:

Բացի դրանից Microsoft-ը փորձեց առաջ ընկնել եւ iPad-ի շնորհանդեսից երեք օր առաջ ընկերության այն ժամանակվա ղեկավար Ստիվ Բամլերը ներկայացրեց Slate 500 անունը կրող պլանշետը, որը արտադրվել էր HP ընկերության հետ համատեղ: Բայց, քանի որ այդ սարքը աշխատում էր Windows 7 օպերացիոն համակարգով, իսկ այդ համակարգը նախատեսված չէր պլանշետներում օգտագործելու համար, Slate 500-ը հաջողություն չունեցավ: Ավելին՝ iPad-ի շնորհանդեսի օրը նրա մասին բոլորը մոռացան:

Apple-ը օրիգինալ սարք արտադրեց, որը նպատակաուղղված էր ոչ այնքան ինչ-որ բան ստեղծելու, որքան ընդունելու եւ փոխանցելու համար: iPad-ի մասին խոսակցությունները սկսվել էին թողարկվելուց շատ ժամանակ առաջ: Օգտատերերը անհամբերությամբ սպասում էին, թե արդյո՞ք Apple-ը իրենց թույլ կտա «ձեռքի վրա» ֆիլմեր նայել, խաղալ, համացանց մուտք գործել, կարդալ էլեկտրոնային գրքեր եւ թերթեր:

Առաջին iPad-ի շնորհանդեսին եկած հանրությունը Սթիվ Ջոբսին, որը այդ ժամանակ արդեն չէր թաքցնում, որ ծանր հիվանդ է, կանգնած եւ բուռն ծափահարություններով դիմավորեց: «Մեզանից յուրաքանչյուրը օգտագործում է սմարթֆոն եւ նոթբուք: Մեզ հետաքրքրում է արդյո՞ք նրանց մեջտեղում տեղ կա երրորդ սարքի համար»,- առաջին iPad-ը ներկայացնելուց առաջ հայտարարեց Apple-ի ղեկավարը: Հինգ տարվա ընթացքում վաճառված սարքերի քանակը ցույց է տալիս, որ տեղ իրոք եղել է:

Apple վաճառքի առաջին օրը 300.000 սարք վաճառվեց: Մեկ միլիոն պլանշետ ԱՄՆ-ում վաճառվեց մեկ ամսվա ընթացքում: Առաջին տարվա ընթացքում Apple 14.8 միլիոն iPad վաճառեց ամբողջ աշխարհում, որը զբաղեցրեց այդ շուկայի 90%-ը: Դա մոտավորապես 5 անգամ ավելի շատ է քան կանխատեսում էին վերլուծաբանները:

Հետաքրքիր է, որ Ջոբսը հետագայում խոստովանեց, որ սկզբում Apple-ը iPad-ի նախնական տարբերակն է թողարկել եւ միայն այդ տարբերակից է ստեղծվել iPhone-ը: Պլանշետային համակարգիչը որոշվել է թողարկել այն ժամանակ, երբ տեխնոլոգիաները ավելի շատ կզարգանան: Եվ Ջոբսը չսխալվեց: Չէ՞ որ հիմա էլ պլանշետ բառը լսելիս մենք առաջին հերթին iPad-ն ենք հիշում:

Համարժեք եւ դեռ մի բան էլ ավելի պատասխանը եղել է

Պաշտպանության բանակի տվյալներով` անցած շաբաթվա ընթացքում Ադրբեջանը ղարաբաղա-ադրբեջանական զորքերի շփման գծում ունեցել է 14 զոհ եւ 20 վիրավոր: Միայն կարելի է ենթադրել, թե եթե այս թվին գումարենք Հայաստանի հետ սահմանին ունեցած զոհերի, ինչպես նաեւ նախորդ երկու շաբաթների զոհերի քանակը ինչ մեծ թիվ կկազմի:

Համաձայն ԼՂՀ պաշտպանության բանակի եւ ՀՀ պաշտպանության նախարարության հունվարի 2-ից հետո տարածած հաղորդագրությունների այս տարի հայկական կողմը ունեցել է 12 զոհ: Միայն այս համեմատությունը ապացուցում է, որ մերոնք համարժեք եւ դեռ մի բան էլ ավելի պատասխան տվել են:

Վերջին շրջանում սոցցանցերում շատ հաճախ կարելի էր հանդիպել գրառումների կամ մեկնաբանությունների, որոնցով օգտատերերը իրենց կասկածներն էին հայտնում համարժեք պատասխանի առկայության մասին: Նրանք դժգոհում էին, թե Հայաստանի պաշտոնյաները միայն խոսում են համարժեք եւ դեռ մի բան էլ ավելի պատասխանի մասին, բայց իրականում ոչինչ չեն անում:

Կա մի հանգամանք, որը ոչ բոլորն են հաշվի առնում: Ի տարբերություն Հայաստանի, Ադրբեջանում կա նախագահի «Հայաստանի Հանրապետության և Ադրբեջանի Հանրապետության զորքերի շփման գծում անվտանգության մի շարք կանոնների վերաբերյալ» հրամանագիրը, որով կասեցվել է սեփական զինուժին վերաբերող ցանկացած բացասական, առավել ևս` շփման գծում ձախողումներին վերաբերող տեղեկատվության հրապարակումը:

Իսկ Հայաստանում լրատվամիջոցները այդ առումով ազատ են: Հետեւելով մեր լրահոսին կարող ենք իմանալ, թե ինչ է կատարվում սահմանին եւ քանի զոհ ու քանի վիրավոր ունենք: Բացի նրանից, որ ՀՀ ՊՆ-ն եւ ԼՂՀ ՊԲ-ն ամեն օր հաղորդագրություններ են տարածում սահմանում տիրող իրավիճակի մասին, լրագրողները կարողանում են սեփական հետաքննությունների եւ սահմանամերձ գյուղեր այցելությունների միջոցով պարզել իրականությունը:

Ադրբեջանում նույնպես եղան այդպիսի հետաքննություններ: Մասնավորապես անցած տարվա օգոստոսյան դեպքերի ժամանակ, երբ Ադրբեջանում գերության մեջ հայտնվեց եւ հետագայում խոշտանգումների արդյունքում մահացավ Տավուշի մարզի, Չինարի գյուղի բնակիչ Կարեն Պետրոսյանը, «Ազատություն» ռադիոկայանի ադրբեջանական ծառայության նկարահանող խումբը, գնաց այն գյուղը, որտեղ հայտնվել էր Պետրոսյանը, խոսեց գյուղի բնակիչների հետ եւ փորձեց պարզել իրականությունը:

Բոլորս տեսանք, թե դրանից հետո ինչ կատարվեց «Ազատություն» ռադիոկայանի ադրբեջանական ծառայության հետ: Թղթակիցներից մեկին ձերբակալեցին, ծառայության գրասենյակը փակեցին, մնացած աշխատակիցներին էլ անընդհատ հարցաքննում ինչ-որ անհասկանալի մեղադրանք առաջադրելով ռադիոկայանին:

Այդ իսկ պատճառով ադրբեջանական լրատվամիջոցները զգուշանում են իրենց բանակի ձախողումների մասին ինֆորմացիա հրապարակելուց, քանի որ կարող են արժանանալ «Ազատություն» ռադիոկայանի ճակատագրին: Իսկ Հայաստանում նման բան չկա:

Այս ամենից կարելի է անել մի ենթադրություն. եթե կա ինֆորմացիայի պակաս, դա դեռ չի նշանակում, որ ինչ-որ բան չի եղել:

Facebook-ը վտանգավո՞ր է առողջության համար

Դուք դա կարող եք անել հերթի մեջ, մեքենայով կարմիր լույսի տակ կանգնած կամ նույնիսկ զրույցի ընթացքում: Մարկ Ցուկերբերգի գնահատմամբ՝ ցանկացած մարդ ամեն օր 40 րոպե է ծախսում դրա վրա: Հաղորդում է Foxnews.com-ը:

Դա Facebook-ն է: Հետազոտությունը ցույց է տալիս, որ համատարած ձգտումը տեսնելու, թե ինչ է հրապարակվել Facebook-ում այն պահից հետո, երբ դուք դուրս եք եկել կայքից` կարող է կտրել Ձեզ քնից, անձնական հարաբերություններից եւ վնասել առողջությունը:

Facebook օգտագործելը կարող է անվնաս սովորություն թվալ, սակայն որոշ հետազոտություններ ցույց են տալիս, որ դա կարող է վտանգավոր լինել առողջության համար:

Pew Resarch կենտրոնի համացանցի ծրագրի տվյալների համաձայն՝ չափահասների 73%-ը օգտագործում են սոցիալական ցանցերը, որոնց մեջ առաջին տեղն է զբաղեցնում Facebook-ը: Սոցիալական ցանցերով ամենաշատը զբաղվում են Facebook-ի օգտատերերը: Նրանցից 40%-ը իրենց էջերը օրական մի քանի անգամ ստուգում են:

Facebook-ի հետեւանքները

Դուք կարող է չմտածեք, որ որեւէ գրառում կամ տեղադրված նկար կարող է ազդեցություն ունենալ Ձեզ վրա, բայց հետազոտությունը ցույց է տալիս, որ այս բարորակ թվացող գործողությունները կարող են վատ ազդեցություն ունենալ Ձեր առողջության եւ բարեկեցության վրա:

Անկախ տարիքից սոցիալական ցանցերով տարվելը կարող է Ձեզ ավելի մտահոգ դարձնել: Մի շարք հետազոտություններ ցույց են տալիս, որ Facebook-ը ավելացնում է անհանգստությունը այն ժամանակ, երբ Դուք սկսում եք Ձեր կյանքը համեմատել Ձեր Facebook-ի ընկերների կյանքերի հետ կամ երբ Դուք չեք ստուգել Ձեր ծանուցումները, որոշ ժամանակ:

Նույնիսկ, երբ դուք գիշերը պառկում եք քնելու, սոցիալական ցանցերի օգտագործումը կարող է ազդել Ձեր առողջության վրա: 6000 բրիտանացիների միջեւ անցկացված հարցումները ցույց են տվել, որ չափահաս մարդիկ ամեն գիշեր մոտավորապես 16 րոպե են ծախսում սոցիալական ցանցերում, կրճատելով քնի տեւողությունը: Քնի պակասը կարող է բարձրացնել դեպրեսիայի,անհանգստության, գիրության, սրտի կաթվածի եւ մահվան վտանգը:

Բայց Facebook-ն իր դրական կողմերն էլ ունի: Շատ մարդիկ, որոնք օգտագործում են այդ սոցիալական կայքը առողջական խնդիրները հաղթահարելու եւ նմանատիպ խնդիրներ ունեցող մարդկանց հետ կապվելու համար: Այս կապերը կարող էին հնարավոր չլինել, եթե անծանոթների հետ շփումը այսքան չհեշտանար: Բացի այդ մարդիկ, ովքեր Facebook-ում ազնիվ են ներկայանում կարող են երջանկություն զգալ, քանի որ նրանք քաղում են իրենց ընկերների աջակցության պտուղները համացանցում: