iPad-ը այսօր դարձավ 5 տարեկան

Macdigger.ru-ն գրում է. 5 տարի առաջ այս օրը՝ հունվարի 27-ին Apple-ը աշխարհին ներկայացրեց առաջին iPad-ը, որը առանց չափազանցնելու հեղափոխություն իրականացրեց համակարգչային տեխնիկայի շուկայում: Սարքը, որը կարողանում էր համատեղել համակարգչի, ընթերցանության սարքերի եւ մասամբ սմարթֆոնի հնարավորությունները, հայտնագործություն էր օգտատերերի համար

Apple առաջին կազմակերպությունը չէր, որը թողարկեց պլանշետ: Դեռ 2000-ական թվականների սկզբում շուկայում արդեն հասանելի էին ViewSonic V1100 եւ Fujitsu Stylistic ST4000 պլանշետները: Սակայն այս սարքերը բարձր գին ունեին (2-3 հազար դոլար), չափսերի եւ քաշի պատճառով հեշտ չէին օգտագործելու համար, մարտկոցը շատ քիչ էր աշխատում՝ 2-3 ժամ: Արտադրողները նշում էին, որ սարքը աշխատելու համար է: Հենց այդ նպատակով էլ սարքի հետ արտադրվել էր հատուկ գրիչ եւ սեղանին տեղադրելու հարմարանք:

Բացի դրանից Microsoft-ը փորձեց առաջ ընկնել եւ iPad-ի շնորհանդեսից երեք օր առաջ ընկերության այն ժամանակվա ղեկավար Ստիվ Բամլերը ներկայացրեց Slate 500 անունը կրող պլանշետը, որը արտադրվել էր HP ընկերության հետ համատեղ: Բայց, քանի որ այդ սարքը աշխատում էր Windows 7 օպերացիոն համակարգով, իսկ այդ համակարգը նախատեսված չէր պլանշետներում օգտագործելու համար, Slate 500-ը հաջողություն չունեցավ: Ավելին՝ iPad-ի շնորհանդեսի օրը նրա մասին բոլորը մոռացան:

Apple-ը օրիգինալ սարք արտադրեց, որը նպատակաուղղված էր ոչ այնքան ինչ-որ բան ստեղծելու, որքան ընդունելու եւ փոխանցելու համար: iPad-ի մասին խոսակցությունները սկսվել էին թողարկվելուց շատ ժամանակ առաջ: Օգտատերերը անհամբերությամբ սպասում էին, թե արդյո՞ք Apple-ը իրենց թույլ կտա «ձեռքի վրա» ֆիլմեր նայել, խաղալ, համացանց մուտք գործել, կարդալ էլեկտրոնային գրքեր եւ թերթեր:

Առաջին iPad-ի շնորհանդեսին եկած հանրությունը Սթիվ Ջոբսին, որը այդ ժամանակ արդեն չէր թաքցնում, որ ծանր հիվանդ է, կանգնած եւ բուռն ծափահարություններով դիմավորեց: «Մեզանից յուրաքանչյուրը օգտագործում է սմարթֆոն եւ նոթբուք: Մեզ հետաքրքրում է արդյո՞ք նրանց մեջտեղում տեղ կա երրորդ սարքի համար»,- առաջին iPad-ը ներկայացնելուց առաջ հայտարարեց Apple-ի ղեկավարը: Հինգ տարվա ընթացքում վաճառված սարքերի քանակը ցույց է տալիս, որ տեղ իրոք եղել է:

Apple վաճառքի առաջին օրը 300.000 սարք վաճառվեց: Մեկ միլիոն պլանշետ ԱՄՆ-ում վաճառվեց մեկ ամսվա ընթացքում: Առաջին տարվա ընթացքում Apple 14.8 միլիոն iPad վաճառեց ամբողջ աշխարհում, որը զբաղեցրեց այդ շուկայի 90%-ը: Դա մոտավորապես 5 անգամ ավելի շատ է քան կանխատեսում էին վերլուծաբանները:

Հետաքրքիր է, որ Ջոբսը հետագայում խոստովանեց, որ սկզբում Apple-ը iPad-ի նախնական տարբերակն է թողարկել եւ միայն այդ տարբերակից է ստեղծվել iPhone-ը: Պլանշետային համակարգիչը որոշվել է թողարկել այն ժամանակ, երբ տեխնոլոգիաները ավելի շատ կզարգանան: Եվ Ջոբսը չսխալվեց: Չէ՞ որ հիմա էլ պլանշետ բառը լսելիս մենք առաջին հերթին iPad-ն ենք հիշում:

Պարզ մեթոդ Apple-ի Touch ID-ի աշխատանքը բարելավելու համար

iPhone 5s-ի, 6-ի եւ 6 Plus-ի որոշ օգտատերեր դժգոհում են հեռախոսի գլխավոր կոճակի վրա տեղակայված մատնահետքի սկաների ոչ նորմալ աշխատանքից: Վեբ ծրագրավորող Ջոշ Բետսը Touch ID-ի աշխատանքը բարելավելու պարզ մեթոդ է հայտնաբերել, փոխանցում է Macdigger.ru-ն:

iOS 8-ում կա հնարավորություն բարելավելու մատնահետքերի ճանաչման գործընթացը, առանց նորից մատը սկան անելու:  Ծրագրավորողը մասնավորապես նշել է. «Բարելավումը սկսելու համար մտեք կարգավորումների մենյու (Settings), հետո Touch ID and password: Հավաքեք կոդը, որպեսզի կարողանաք փոխել մատնահետքի սկաների կարգավորումները:

Հիմա հեռախոսում գրանցված մատով հպվեք Touch ID սկաներին: Դուք կտեսնեք, որ մի քանի վայրկյանով Ձեր մատնահետքի տողը մոխրագույն երանգ կստանա (նկարում): Հիմա, որպեսզի բարելավեք սկաների աշխատանքը եւ մատնահետքի ճանաչման արագությունը, շարունակեք նույն մատով, բայց տարբեր դիրքերով մի քանի անգամ դիպչել սկաներին»:

Եթե հեռախոսի հիշողության մեջ մի քանի մատ ունեք գրանցած, ապա նույն գործողությունը պետք է կատարել բոլոր մատների համար: Եթե այսպիսի գործողությունը պարբերաբար կատարեք, կարիք չի լինի մատնահետքը ջնջել եւ նորից սկան անել: 

Ի՞նչ նորամուծություններ կարելի է սպասել Apple-ից 2015 թվականին

Նոր տարվա շեմը շատ լավ ժամանակ է անցնող տարին ամփոփելու, ինչպես նաեւ մյուս տարվա ծրագրերը կազմելու համար: Մեկը երազանքներ է պահում, մյուսը ապագան է կանխատեսում, քանի որ այդպես է ընդունված տոնական օրերի նախօրեին

VentureBeat-ի հեղինակ Մարկ Սալիվանը պատկերացրել է, թե ինչով Apple-ը մեզ կուրախացնի 2015 թվականին: Փոխանցում է Iphones.ru-ն:

Կրկին կարտադրվի պլաստմասե iPhone

Կարծես թե iPhone 5c-ն բավականին հաջողված մոդել էր, այսպիսով` մյուս տարի մեզ սպասվում է պլաստմասե iPhone 6: Այս մոդելի գլխավոր առանձնահատկությունը, իհարկե, էժան գինն է եւ գունավոր պատյանը: Apple-ի համար iPhone-ի մոդելների շատացումը լավ է NFC չիպով սարքերի տարածման համար, որն էլ իր հերթին կզարգացնի Apple Pay-ը: Բացի դրանից շատ մարդիկ հնարավորություն կունենան Apple Watch-ից օգտվեն:

 iPhone 6s

Համաձայն նոր սարքերի արտադրման ժամանակացույցի, 2015-ին iPhone 6s-ը կթողարկվի: Այդ սարքի նորամուծությունները, ամենայն հավանականությամբ, կլինեն բարելավված տեսախցիկը, սապֆիրե ապակին էկրանին եւ, հնարավոր է, 3D ցույց տալու հնարավորություն:

Սմարթ-ժամացույցներ

Аpple Watch-ը կթողարկվի մյուս տարվա սկզբում, մինչեւ Սուրբ Վալենտինի օրը: Apple-ի նորամուծությունը կարող է հեղափոխություն իրականացնել սմարթ-ժամացույցների ասպարեզում, եթե օգտագործելիս իսկապես ցուցաբերի այն հատկանիշները, որոնց մասին հայտարարվել է: Հենց այդ պատճառով էլ Apple Watch-ին անհամբերությամբ են սպասում: Բացի դրանից, Apple-ի նոր սարքը սպառնում է փոխել Samsung, Motorola, Sony եւ Pebble ընկերությունների սարքերի ճակատագիրը փոխել:

Ազատություն սմարթ-ժամացույցներին

Apple Watch-ի մյուս մոդելներին արդեն պետք չեն գա iPhone-ներ Apple Pay-ով վճարումներ կատարելու համար: Կան տվյալներ, որ Apple իր սմարթ-ժամացույցների համար արտադրել է առանձին, ավելի փոքր չափսի NFC չիպ: Եթե այս մոդելին պետք է լինելու iPhone վճարումներ կատարելու համար, ապա նոր մոդելներին՝ ոչ: 8.

Մեծ iPad

Սպասվում է 12 դյույմանոց iPad-ի թողարկում: Այս ենթադրությունը հիմնված է արտադրողի այն հայտարարություններով, որ ուզում են ներթափանցել կորպորատիվ ոլորտ: Օրինակ` կազմակերպությունը արդեն հարմարեցնում է իր արտադրանքները բուժաշխատողների համար (նրանց հարմար է օգտագործել iPhone 6 Plus եւ iPad Air):

Սակայն կորպորատիվ դաշտում շատերը երազում են մի սարքի մասին, որը կլրացներ պլանշետի եւ նոթբուքի միջեւ ընկած տարածությունը: Եվ օրինակ 12 դյույմանոց էկրանով iPad Air-ը կարող է դառնալ այդ սարքը: Սպասենք հունիս ամսին եւ նոր անոնսներին:

Այլ սարքերի մասին, որոնք կարող են թողարկվել 2015 թվականին կարդացեք այստեղ:

Լույս է տեսել Apple-ի iOS 8.1 օպերացիոն համակարգը

Հոկտեմբերի 16-ին, նոր iPad Air 2-ի եւ iPad Mini 3-ի շնորհանդեսի ժամանակ, ամերիկյան Apple ընկերության ներկայացուցիչները խոստացել էին, որ հոկտեմբերի 20-ին լույս կտեսնի iOS 8 օպերացիոն համակարգի առաջին մեծ թարմացումը՝ iOS 8.1 համակարգը:

Եվ ահա այսօր iOS 8.1-ն արդեն հասանելի է iսարքեր օգտագործողներին: Apple-ի հաղորդագրության համաձայն թարմացումը իր մեջ ներառում է նոր հնարավորություններ, բարելավումներ եւ նախորդ թարմացումների արդյունքում առաջացած խնդիրների լուծումներ:

Այս թարմացմամբ արդեն հասանելի է դառնում Apple-ի վճարման նոր համակարգը՝ Apple Pay-ը, որը կարող են օգտագործել iPhone 6-ի եւ iPhone 6 Plus-ի ամերիկաբնակ օգտատերերը: Հետագայում, ամենայն հավանականությամբ, համակարգը հասանելի կլինի նաեւ այլ երկրներում:

Այս թարմացմամբ beta տարբերակով սկսվում է iCloud նկարների գրադարանի աշխատանքը, որը թույլ է տալիս Ձեր iCloud-ի էջով աշխատող բոլոր սարքերում տեսնել Ձեր բոլոր սարքերից արած նկարները: Հնարավոր է դառնում նաեւ SMS հաղորդագրություններ ուղարկել iPad-ից եւ Mac-ի օգտագործելով iPhone-ը:

iOS 8.1 համակարգը լուծում է Wi-fi-ի, Bluetooth-ի հետ կապված խնդիրները, ավելացվել է 2G, 3G, LTE բջջային ցանցերի միջեւ ընտրություն կատարելու հնարավորությունը, Safari վեբ-դիտարկիչում վերացվել է թերությունը, որը կարող էր խնդիրներ առաջացնել տեսանյութերի դիտմանը եւ այլն:

Բավականին արագացել է iսարքերի աշխատանքը: Իհարկե, կան շատ փոքր նորամուծություններ, որոնք ի հայտ են գալիս օգտագործելիս:

Այս թարմացումը կարող են քաշել iPhone 4S, iPhone 5, iPhone 5C, iPhone 5S, iPhone 6, iPhone 6 Plus հեռախոսների, 5-րդ սերնդի iPod-ի, iPad 2, iPad 3, iPad 4, iPad Air, iPad Air 2, iPad Mini, iPad Mini with retina display եւ iPad Mini 3 սարքերի օգտատերերը: